حكايه الولد الشقى إلى رجع لأهله بعد ١٤ سنه
الولد الشقي حكاية أحمد فارس اللي اتشعبط في عربية نصف نقل وهو صغير راح ليبيا
ورجع بعد ١٤ سنه غيا
يحكي رامي الجبالي مؤسس اطفال مفقودة
سنه ٢٠١١ أحمد زي أي طفل شقي شويه نزل يلعب تحت بيتهم، اتشعبط في عربيه نقل
و اختفي.
اهل المنطقه قلبت الدنيا عشان يوصلوا له
يوم و اثنين و شهر واثنين مفيش فايده.
ابوه لف مصر كلها عليه، مسابش مكان مراحوش … راح السويس لما عرف ان في دار كبيره هناك و ممكن ابنه يكون فيها … لف فيها لحد ما خلصت فلوسه … و باع عربيته هناك … و اهالي السويس لما عرفت حكايته اخدوه علي بورسعيد … و اهالي بورسعيد لما عرفوا حكايته بحثوا معاه كثير وللأسف مفيش فايده .. اخدوه و طلعوا بيه علي الاسكندريه اللي برضو موصلش فيها لحاجه.
فاكرين اللي اشتري العربيه في السويس ؟ رجعهاله … و رجعهاله في القاهره عشان شاف انه باعها عشان يدور علي ابنه.
ابو فارس رجع علي القاهره و لزق صور أحمد ابنه علي أوتوبيسات النقل العام … تلف بصورته شوارع مصر … وبرضو مفيش فايده.
فعمل منشور علي فيسبوك سنه ٢٠١٥ بيبحث عنه … و موصلش لحاجه … و للأسف جدته اللي كان روحها فيه توفاها اللي بعد اربع شهور من الحزن … و الام و الأب المشاكل بينهم زادت بسبب احساسهم بالذنب في اختفاء ابنهم … و حتي البيت مبقوش قادرين يعيشوا فيه عشان كل ركن فيه بيفكرهم بأحمد … فباعوا البيت.
أحمد بقي دخل دار رعايه، و قال اسمه صح .. أحمد فارس .. و طلع بإسمه شهاده ميلاد افتراضيه بإسمه اللي قاله صح … بس محدش دور علي اهله.
عاش أحمد بين دور الرعايه اللي اتبهدل فيهم … منهم اللي تقفل و اللي تطرده و اللي هرب منها و يلاقي نفسه في الشارع وحيد … لا أخ و لا اخت ولا عائله.
سافر علي ليبيا وسط ناس متعرفهوش يشتغل اي حاجه، و يحاول يعمل فلوس تسنده في الدنيا لانه ملوش حد غير ربنا.
من أقل من ١٠ ايام وصل لنا البوست اللي نشره والد أحمد للبحث عنه سنه ٢٠١٥ لأول مره .. و استغربنا جدا ان الطفل ده مش عندنا طول الفتره دي.
فريق التشبيهات و القائمين علي تطبيقات التعرف علي الوجوه لفت نظره في الصوره ان الطفل ده شبه حد منشور عندنا بالفعل في صوره فيها أكثر من طفل !
و فعلا … برنامج التعرف علي الوجوه أكد لنا انه هو فعلا … لازم نوصل لهم.
حوالنا نتصل علي الرقم المكتوب للاسف الرقم اتغير …
بدأنا رحلة بحث عن ناشر البوست سنه ٢٠١٥ و نشرنا نداء لأهالي المنطقه اللي قالوا انه تاه منها … و اخيرا وصلنا لهم.
و بدأنا نشوف أحمد فارس دلوقت بقي فين … لان الصوره اللي عندنا قديمه جدا و المعلومات اللي عندنا عنه قديمه و انقطعت اخباره من سنين طويله …
بدأنا نسأل مشرفين في دور رعايه عاش فيها أحمد، و شباب عاش معاهم أحمد في دور رعايه او كان معاهم في الشارع بعد طردهم من دور رعايه علي مدار سنين …
و فعلا … وصلنا لأحمد اللي كان في ليبيا و لما عرف مصدقش، لبس هدومه و نزل علي مصر و منها علي محل يشتري هدوم جديده عشان يشوفوه جميل … و قابلنا و روحنا لوالده و اخواته.
تعرفوا ابوه اول ما شافه قاله ايه ؟
قال والله روحت اشتريت هدوم جديده عشان لما يشوفني يتبسط و يحبني و يشوفني في أحسن صوره.
نزلنا و صورنا عشان تشوفوا فرحة الناس … و حجم المعاناه و المأساة اللي بيعيشها المفقود و اهله علي مدار سنين … البيت راح، العربيه راحت، و العمر راح … و حتي جدته راحت … و لما كل حاجه راحت … أحمد رجع.
دي صوره أحمد وسط مجموعه صغيره من اخواته، و الباقي في الطريق جايين عشان يشوفوه
